İnsan niyə başladığı işi yarımçıq qoyur?

Bir işə böyük həvəslə başlamaq, lakin onu sona çatdırmadan yarımçıq qoymaq bir çox insanda rast gəlinən haldır. Yeni məqsəd müəyyənləşdirərkən motivasiya yüksək olsa da, proses irəlilədikcə həmin həvəs azala bilər.
Menbe.az saytında başladığınız işi niyə yarımçıq qoyduğunuzu, bunun əsas səbəblərini və işi sona çatdırmaq üçün hansı addımları ata biləcəyini öyrənəcəksiniz.

Mükəmməl nəticə gözləmək işi yarımçıq qoymağa səbəb olur

İnsan qarşısına yüksək tələblər qoyduqda kiçik uğursuzluqları belə ciddi problem kimi qəbul edə bilər. İş planlaşdırıldığı kimi getmədikdə motivasiya azalır və davam etmək çətinləşir. Nəticədə insan yaxşı nəticəni kifayət hesab etmək əvəzinə yalnız qüsursuz nəticəyə fokuslanır. Bu yanaşma isə başladığı işi yarımçıq qoymasına səbəb ola bilər.

Özünü həddindən artıq tənqid etmək

Başladığı işi bitirə bilməyən insanların bir hissəsi özlərinə qarşı çox sərt davranırlar. Kiçik səhvdən sonra bacarıqlarını şübhə altına alır, nəticənin uğursuz olacağını düşünürlər. Belə yanaşma davam etmək istəyini zəiflədir. Halbuki səhvlər işin sona çatdırılmasına maneə deyil, prosesin bir hissəsi kimi qəbul edilə bilər.

Uğursuzluq qorxusu

İnsan bəzən uğursuz nəticə ilə qarşılaşmamaq üçün işi özü yarımçıq qoyur. Belə olduqda nəticənin necə olacağı heç vaxt məlum olmur və insan özünü uğursuz hesab etməkdən yayınmağa çalışır. Ancaq bu davranış təkrarlandıqca yarımçıq qalan işlərin sayı artır və insanın özünə olan inamı zəifləyə bilər.

Qarşıya həddindən artıq böyük məqsədlər qoymaq

Məqsəd çox böyük və çətin görünəndə ona çatmaq da ağır təsir bağışlayır. Buna görə böyük işi daha kiçik mərhələlərə bölmək faydalıdır. Bütün nəticəyə fokuslanmaq əvəzinə növbəti konkret addımı müəyyənləşdirmək işi davam etdirməyi asanlaşdırır.

İlk çətinlikdə həvəsdən düşmək

Başlanğıcdakı həvəs bütün proses boyunca eyni səviyyədə qalmaya bilər. İlk maneə ilə qarşılaşdıqda işi buraxmaq isə məqsədə çatmağın qarşısını alır. Burada əsas məsələ yalnız həvəsə güvənmək deyil, işi ardıcıl şəkildə davam etdirməkdir.

Yarımçıq qalan işlər özünə inamı azalda bilər

İnsan qarşısına məqsəd qoyduqda əslində özünə müəyyən öhdəlik verir. Bu öhdəliklər dəfələrlə yerinə yetirilmədikdə özünə olan güvən zəifləyə bilər. Üstəlik, yarımçıq qalan işlər insanın fikrini məşğul etməyə davam edə bilər. Buna görə daha real məqsədlər müəyyənləşdirmək və başladığını sona çatdırmağa diqqət yetirmək vacibdir.

Başladığın işi necə sona çatdırmaq olar?

Hər işi qüsursuz görmək istəyindən uzaqlaşmaq lazımdır. Məqsədi aydın müəyyənləşdirmək, onu kiçik hissələrə bölmək və hər mərhələyə ayrıca diqqət yetirmək işi asanlaşdırır. Kiçik səhvlərə görə bütün planı dayandırmaq əvəzinə qaldığın yerdən davam etmək daha düzgün yanaşmadır.
Başladığın işi bitirmək üçün əsas şərt hər şeyi mükəmməl etmək deyil, səhvlərə baxmayaraq davam etmək və nəticəyə çatmaqdır.