Telefon oğurlanarsa məlumatları necə qorumaq olar?

Telefonda şəxsi şəkillər, mesajlar, e-poçt hesabları, bank tətbiqləri, sosial şəbəkələr və başqa məxfi məlumatlar saxlanıla bilər. Cihaz yad şəxsin əlinə keçdikdə əsas məsələ həmin məlumatlara girişin qarşısını almaqdır. Bunun üçün telefondakı təhlükəsizlik imkanlarından düzgün istifadə etmək böyük əhəmiyyət daşıyır.
Bəs telefon oğurlandıqda şəxsi məlumatların başqasının əlinə keçməsinin qarşısını almaq üçün hansı addımlar atılmalıdır? Menbe.az saytı ətraflı araşdırmanı təqdim edir?

Telefonu uzaqdan kilidləyin

Telefon oğurlandıqda ilk addımlardan biri cihazı uzaqdan kilidləməkdir. Ekran kilidi aktiv olduqda telefonu əldə edən şəxsin şəxsi məlumatlara, tətbiqlərə və hesablara daxil olması xeyli çətinləşir.
iPhone istifadəçiləri "Find My", Android istifadəçiləri isə cihaz tapma funksiyası vasitəsilə telefonu xəritədə görə, kilidləyə və müəyyən hallarda ekranda əlaqə məlumatı göstərə bilərlər. Telefon internetə qoşuludursa, bu funksiyalar cihaz üzərində məsafədən nəzarət etməyə imkan verir.

Elektron poçt hesabının şifrəsini dəyişdirin

Elektron poçt hesabı xüsusi əhəmiyyət daşıyır. Çünki bir çox xidmətlərdə şifrənin yenilənməsi üçün təsdiq məktubu məhz elektron poçta göndərilir. Telefonu əldə edən şəxs poçt hesabına daxil ola bilirsə, digər hesabları da ələ keçirməyə cəhd göstərə bilər.
Buna görə əsas elektron poçt hesabının şifrəsini dəyişdirmək, hesabda açıq qalan sessiyaları yoxlamaq və oğurlanmış telefonu etibarlı cihazlar siyahısından çıxarmaq məsləhətdir.

Bank və ödəniş tətbiqlərini qoruyun

Telefonda mobil bankçılıq tətbiqləri və ya kart məlumatları varsa, bankla əlaqə saxlamaq lazımdır. Şübhəli giriş ehtimalı olduqda kartın istifadəsini məhdudlaşdırmaq və hesab əməliyyatlarını yoxlamaq məlumatların və pul vəsaitlərinin qorunmasına kömək edir.
Telefonun ekran kilidinin olması müəyyən müdafiə yaratsa da, yalnız buna güvənmək düzgün deyil. Xüsusilə bank tətbiqlərinə giriş məlumatlarının telefonda saxlanması riski artırır.

Telefonu iki mərhələli təsdiqləmədən çıxarın

Bir çox hesabda giriş kodları SMS və ya autentifikasiya tətbiqi vasitəsilə telefona göndərilir. Oğurlanmış cihaz həmin hesablar üçün etibarlı cihaz kimi qalarsa, təhlükəsizlik riski yarana bilər.
Google, sosial şəbəkə, elektron poçt və digər vacib hesabların təhlükəsizlik bölməsini yoxlamaq, oğurlanmış cihazın giriş icazəsini ləğv etmək lazımdır. Telefon iki mərhələli təsdiqləmə üçün istifadə olunurdusa, həmin üsulun da yenilənməsi məqsədəuyğundur.

Lazım gələrsə telefondakı məlumatları uzaqdan silin

Telefonun geri qaytarılacağına ümid azdırsa və cihazda həssas məlumatlar varsa, uzaqdan silmə funksiyasından istifadə etmək mümkündür. Bu seçim şəxsi faylların və cihazda saxlanılan məlumatların yad şəxsin əlinə keçməsi riskini azaldır.
Ancaq məlumatları silməzdən əvvəl diqqətli olmaq lazımdır. Silinən foto, video, sənəd və digər faylların ehtiyat nüsxəsi yoxdursa, onları geri qaytarmaq mümkün olmaya bilər. Məlumatların uzaqdan silinməsi cihazın sonradan xəritə üzərindən izlənməsinə təsir göstərə bilər.

Məlumatların ehtiyat nüsxəsini saxlamaq niyə vacibdir?

Telefon məlumatlarının ehtiyat nüsxəsinin olması cihaz oğurlandıqda mühüm üstünlük yaradır. Fotoşəkillər, kontaktlar, sənədlər və digər vacib fayllar bulud hesabında və ya başqa təhlükəsiz yaddaşda saxlanılırsa, telefon uzaqdan silinsə belə məlumatların bir hissəsini bərpa etmək mümkündür.
iPhone və Android cihazlarında məlumatların ehtiyat nüsxəsini saxlamaq üçün sistemə daxil edilmiş imkanlardan istifadə edilə bilər.

Hansı təhlükəsizlik tədbirləri görülməlidir?

Telefonu güclü PIN, parol və ya biometrik kilidlə qorumaq məlumat təhlükəsizliyinin əsas hissəsidir. SİM kart üçün ayrıca PIN müəyyənləşdirmək də əlavə müdafiə yaradır.
Cihazın tapılması funksiyasının aktiv olması, vacib məlumatların ehtiyat nüsxəsinin saxlanması və telefonda həssas sənədlərin açıq formada yerləşdirilməməsi də riski azaldır. Bank hesabı nömrələri, şəxsiyyəti təsdiqləyən sənədlərin surətləri və digər məxfi məlumatların telefonda qorunmadan saxlanılması məsləhət görülmür.