Evdə Wi-fi sürətini necə artırmaq olar?

Wi-Fi bağlantısının zəif olması internetdən istifadəni çətinləşdirə bilər. Televizor, telefon, kompüter, oyun konsolu, planşet və digər cihazlar eyni şəbəkəyə qoşulduqda internet sürəti cihazlar arasında bölünür. Menbe.az saytında, Wi-Fi sürətini artırmaq, zəif siqnal problemini azaltmaq və internet bağlantısını daha stabil etmək üçün tətbiq edilə bilən üsulları öyrənəcəksiniz.

Routeri daha yeni modellə əvəz edin

Köhnə routerlər yeni cihazların və yüksək internet sürətinin imkanlarından tam istifadə etməyə bilər. Daha müasir Wi-Fi standartlarını dəstəkləyən routerlər məlumat ötürülməsini yaxşılaşdırır. Çoxsaylı cihazların şəbəkəyə qoşulmasını daha rahat idarə edir.
Router 2.4 GHz və 5 GHz tezliklərini dəstəkləyirsə, cihazları iki tezlik arasında bölmək mümkündür. 2.4 GHz daha geniş əhatə dairəsi təqdim edir. 5 GHz isə uyğun şəraitdə daha yüksək sürət verə bilər. Bu yanaşma şəbəkədə yaranan sıxlığı azaltmağa kömək edir.

Routerin yerləşdiyi yerə diqqət edin

Routerin yerləşməsi Wi-Fi siqnalının gücünə birbaşa təsir edir. Cihazı qapalı şkafın içində, qalın divarların arxasında və ya siqnalı zəiflədə biləcək maneələrin yanında yerləşdirmək bağlantının keyfiyyətini aşağı sala bilər.
Routeri mümkün qədər açıq və mərkəzi nöqtədə yerləşdirmək daha yaxşı nəticə verir. Antenləri olan modellərdə antenlərin istiqamətini dəyişmək də siqnalın müxtəlif istiqamətlərə yayılmasına kömək edə bilər.

Wi-Fi kanalını dəyişdirin

Eyni ərazidə çoxlu Wi-Fi şəbəkəsinin olması müəyyən kanallarda sıxlıq yarada bilər. Router qonşu şəbəkələrlə eyni və ya sıx istifadə edilən kanalda işləyirsə, bağlantının sürəti və sabitliyi zəifləyə bilər.
Routerin idarəetmə bölməsindən daha az yüklənmiş kanal seçmək mümkündür. Xüsusi şəbəkə analiz proqramları hansı kanalların daha çox istifadə edildiyini müəyyənləşdirməyə kömək edir. Daha az sıx kanalın seçilməsi Wi-Fi performansını yaxşılaşdıra bilər.

Wi-Fi şəbəkəsini parolla qoruyun

Açıq və ya zəif qorunan Wi-Fi şəbəkəsinə başqa şəxslər də qoşula bilər. Şəbəkəyə əlavə cihazların bağlanması internet trafikini artıraraq sürətin azalmasına səbəb olur.
Wi-Fi üçün güclü parol təyin etmək və routerin dəstəklədiyi müasir təhlükəsizlik standartlarından istifadə etmək lazımdır. Şəbəkəyə hansı cihazların qoşulduğunu routerin idarəetmə panelindən yoxlamaq da faydalıdır. Tanımadığınız cihaz gördükdə Wi-Fi parolunu dəyişmək məsləhətdir.

Wi-Fi əhatə dairəsini genişləndirin

Routerdən uzaq nöqtələrdə siqnal zəifləyə bilər. Belə hallarda əlavə router, repeater və ya başqa şəbəkə genişləndirici avadanlıqdan istifadə etmək mümkündür.
Əlavə cihaz əsas routerin siqnalını qəbul edib daha zəif əhatə olunan hissələrə ötürür. Bu üsul internet paketinin sürətini artırmır. Lakin Wi-Fi siqnalının çatmadığı və ya zəif olduğu nöqtələrdə bağlantını yaxşılaşdıra bilər.

Telefonda Wi-Fi sürətini necə yaxşılaşdırmaq olar?

Telefonda internet zəif işləyirsə, əvvəlcə Wi-Fi bağlantısını söndürüb yenidən aktivləşdirmək və routeri yenidən başlatmaq olar. Telefonun əməliyyat sistemi və brauzeri yenilənməlidir. Arxa planda internetdən çox istifadə edən lazımsız tətbiqlər bağlanmalıdır.
Brauzerin keş və digər müvəqqəti məlumatlarının təmizlənməsi də bəzi hallarda internetdən istifadəni rahatlaşdırır. Problem davam edirsə, digər cihazlarda bağlantının necə işlədiyini yoxlamaq səbəbin telefonda, routerdə və ya internet xəttində olduğunu müəyyənləşdirməyə kömək edir.

Kompüterdə Wi-Fi bağlantısını necə yaxşılaşdırmaq olar?

Kompüterdə arxa planda işləyən proqramlar internet bağlantısından istifadə edə bilər. Böyük faylların yüklənməsi, bulud sinxronizasiyası və digər şəbəkə fəaliyyəti bağlantıya əlavə yük yaradır.
İstifadə edilməyən proqramları bağlamaq, sistemi zərərli proqramlara qarşı yoxlamaq və Wi-Fi parolunu qorumaq bağlantının daha stabil işləməsinə kömək edir. Problem yalnız kompüterdə müşahidə edilirsə, Wi-Fi adapterinin sürücülərini də yoxlamaq faydalıdır.