CV nədir və necə hazırlanır?

CV iş müraciəti edən şəxsin təhsilini, iş təcrübəsini, bacarıqlarını və peşəkar göstəricilərini təqdim edən sənəddir. İşəgötürən namizəd haqqında əsas məlumatları CV vasitəsilə nəzərdən keçirir. Buna görə məzmunun aydın, konkret və müraciət edilən vəzifəyə uyğun hazırlanması vacibdir.
Menbe.az saytı oxuculara CV-nin hazırlanma qaydalarını təqdim edir.

CV-də hansı məlumatlar olmalıdır?

CV-nin əvvəlində ad, soyad və əlaqə məlumatları göstərilir. Telefon nömrəsi və elektron poçt ünvanının düzgün yazılması xüsusilə vacibdir.
Bundan sonra təhsil, iş təcrübəsi və bacarıqlar qeyd olunur. Əlavə təlimlər, sertifikatlar, təcrübə proqramları, layihələr və uyğun olduğu halda referanslar da CV-yə daxil edilə bilər. Məlumatların hamısını CV-yə yerləşdirmək lazım deyil. Müraciət edilən vəzifə üçün faydalı olan təcrübə və bacarıqlar daha çox ön plana çıxarılmalıdır.

CV necə hazırlanır?

CV hazırlayarkən ilk növbədə sadə və rahat oxunan struktur seçilməlidir. Bölmələr bir-birindən aydın ayrılmalı, uzun və qarışıq abzaslardan istifadə edilməməlidir. İş təcrübəsi bölməsində yalnız işlədiyiniz müəssisənin və vəzifənin adını göstərmək kifayət etmir. Həmin vəzifədə hansı işləri gördüyünüzü və hansı məsuliyyətləri daşıdığınızı qısa şəkildə qeyd etmək daha faydalıdır.
Təhsil bölməsində universitet, kollec və ya digər təhsil müəssisəsi, ixtisas və əldə edilmiş dərəcə göstərilə bilər. Bir neçə təhsil məlumatı varsa, onları ardıcıl və səliqəli şəkildə təqdim etmək CV-nin oxunmasını asanlaşdırır.

CV-də özünüz haqqında nə yazmaq olar?

Özünüz haqqında bölmə CV-nin qısa təqdimat hissəsidir. Burada peşəniz, ixtisaslaşdığınız sahə, əsas bacarıqlarınız və karyera məqsədiniz barədə konkret məlumat vermək olar. Bu hissəni uzun təqdimata çevirmək düzgün deyil. Bir neçə aydın cümlə namizədin hansı sahədə çalışdığını və hansı vəzifələrə uyğun olduğunu göstərmək üçün kifayətdir. Təxminən 50-100 sözlük qısa mətnin olmsaı yetərlidir.

İş təcrübəsi CV-də necə göstərilməlidir?

İş təcrübəsi namizədin peşəkar fəaliyyətini göstərən əsas bölmələrdən biridir. Burada əvvəlki iş yerləri, tutulan vəzifələr və əsas öhdəliklər qeyd edilir.
Məsələn, satış sahəsində çalışan şəxs müştərilərlə işləmək, məhsulların təqdimatı, sifarişlərin idarə olunması və satış nəticələri ilə bağlı təcrübəsini göstərə bilər. Məqsəd görülən işi mümkün qədər aydın təqdim etməkdir. İş təcrübəsi olmayan şəxslər isə təcrübə proqramlarını, könüllü fəaliyyətlərini, layihələrini və uyğun bacarıqlarını ön plana çıxara bilərlər.

Bacarıqlar bölməsinə nə yazılmalıdır?

Bacarıqlar müraciət edilən vəzifəyə uyğun seçilməlidir. Xarici dil bilikləri, kompüter proqramlarından istifadə, texniki biliklər və peşəyə aid digər bacarıqlar burada göstərilə bilər. Komanda ilə işləmək, ünsiyyət, liderlik, təşkilatçılıq və problem həll etmək kimi bacarıqlar da uyğun olduqda əlavə edilir. Sadəcə çoxlu bacarıq yazmaq əvəzinə, həqiqətən sahib olduğunuz və vakansiya üçün əhəmiyyətli olan bacarıqları seçmək daha uyğundur.

CV neçə səhifə olmalıdır?

CV mümkün qədər konkret hazırlanmalıdır. Uzun mətnlər və vəzifə ilə əlaqəsi olmayan məlumatlar əsas məqamların diqqətdən yayınmasına səbəb ola bilər. Standart CV üçün iki səhifənin əksər hallarda kifayət edir. Akademik CV-lərdə isə tədqiqatlar, layihələr və digər elmi fəaliyyətlər səbəbindən sənəd daha geniş ola bilər.

CV hazırlayarkən hansı səhvlərdən qaçmaq lazımdır?

CV-də orfoqrafik səhvlər, qarışıq dizayn, həddindən artıq uzun cümlələr və vakansiyaya aid olmayan məlumatlar sənədin keyfiyyətini aşağı salır. Əlaqə məlumatlarının səhv yazılması da ciddi problemdir. CV-ni bütün vakansiyalara dəyişiklik etmədən göndərmək də düzgün yanaşma deyil. Elanın tələblərinə uyğun bacarıq və təcrübələri ön plana çıxarmaq CV-ni daha məqsədyönlü edir.
Sonda sənədi yenidən oxumaq, məlumatların düzgünlüyünü yoxlamaq və görünüşün rahat oxunduğuna əmin olmaq lazımdır. CV-nin əsas üstünlüyü çox məlumat verməsində deyil, namizəd haqqında vacib məlumatları aydın təqdim etməsindədir.